අවසාන කවිපදය

අවසාන කවිපදය ලියමි
තිත තබා අවසන් කරමි

කලකිරුණු හිත මතම
මියෙමි
ලියන පදයක් ගානෙම
යටි හිතෙන් අඩමි
මතුපිටින් සිනාසෙමි
නුඹ දෙසම බලාඉමි
ඇල් මැරුනු සිතකින් සිතමි
මම අවසාන කවිපදය ලියමි.

ඉඩ තියෙන තැනකින් පටන්ගමි
ලියමි මම වෙන්වෙමි
ඇගිලි අග නියපොතු සපමි
ඉදින් මම නවතිමි
කෙසේ නම් ලියමි

මොහොතකට ඇස් පියාගමි
යලිත් නුඹ දෙස බලමි
නුමේ නෙත් මත නිදමි
යළි සිතමි

අවසාන කවිපදය ලියමි
තිත තබා අවසන් කරමි

-සුනෙත් වෙඩිවර්ධන-

ගැබ්බරයි ප්‍රේමය

සයමසක් මේරූ
දරුගැබකි මගේ පෙම
උපදින්න වෙරදරන
නුඹ නිසා ගැබ්ගත්ත

නුඹේ හිත සමගින්
මගේ හිත සිදුකල
අනවසර ඇසුරින්
ගැබ්බරයි ප්‍රේමය

හැකිවේද ප්‍රේමයට
කුළුඳුලේ උපදින්න
ජාතකේ ලියා
නුඹ නමට

තිස්සේම
උපන්ගෙයි මියයන
තවම නූපන් මගේ ප්‍රේමය
නුඹ හිතට දාවයි
මගේ හිතේ ගැබ්බරයි

-ආදරේ කියන්නේ නොහික්මුනු කලාවක්-
-සුනෙත් වෙඩිවර්ධන-

මේක පට්ට

ඒක පට්ට මරු අදහස
හැමෝම කියනවා ඒක
බලන් යද්දි හැම දෙයක්ම
පට්ට වැඩක් වෙලා ඔන්න

කවුරුත් නැති එකෙක් කියලා
තනිකම එල පට්ට කියලා
හැබැයි ඔන්න තව එකෙක්ට
බඳින එකත් පට්ට වෙලා

මැරුනත් දැන් ඒක පට්ට
මොකක් කලත් ඒක පට්ට
මොනව උනත් ඒක පට්ට
නිකන් ඉන්න එකත් පට්ට

අම්මට සිරි ඒක පට්ට
අඩන එකත් වෙලා පට්ට
හීනා වුනත් ඒක පට්ට
දැන් රැල්ලක් වෙලා පට්ට‍

ඉස්සරනම් වල්ල පට්ට
විකුණ ගත්තොතින්නෙ පට්ට
දැන් ස්ටේටස් එකක් දාලා
රැල්ලේ ගියොත් තමයි පට්ට

හුරුවෙයන් මචං රැල්ලෙ නොයා
රැල්ලට යන එවුන් දිහා
වැල්ලෙ ඉදන් බලන් ඉන්න
එහෙම ඉදන් ලිව්ව මේක
කියවාපන්

ඒක පට්ට

- සුනෙත් වෙඩිවර්ධන -

මචං බස් නැවතුම

ඉතින් බස නැවතුම
කියන් උඹෙ සැපදුක
ආවේ නෑ කාලෙකින්
හොඳින් උඹ හිටියද

සෙනග නේ හැමදාම
උදෙටත් හවසටත්
හැමදාම දකින බස්
ආවාද අද දිනෙත්

මටත් පොඩි ප්‍රශ්නයක්
දන්නවනේ උඹ ඉතින්
ඈ දකින්නට මිසක්
එන්නෑනේ මම ඉතින්

මචං බස් නැවතුම
යාළුවොනෙ අපි ඉතින්
පොඩි දෙයක් ඇහුවොතින්
කියනවද මට ඉතින්

හැමදාම වගේ ඈ
හවස ඔහෙ ආවද
බස් එකක් එනකම්
හෙවනකින් හිටියද

ලංගමක් එනතුරු
තනියෙන්ම හිටියද
කතා කර කර ඉන්න
අක්කලත් හිටියද

සනීපත් නෑළු බං
ඒ නිසයි ආවේ මං
දැන් මොනව කරන්නද
මට නොකියා ගිහින් නං

හෙට උදේ දැක්කොතින්
උදව්වක් කරනවද
මමත්  එනකම් ටිකක්
ඉන්න යැයි කියනවද

ඔන්න බං උඹ ඉතින්
නොකිව්වොත් එහෙම බන්
ආයේ නම් මම් උඹත්
ඒක්ක නෑ කතාවක්

-ආදරේ කියන්නේ නොහික්මුණු කලාවක්-
-සුනෙත් වෙඩිවර්ධන-

ස්නේහයේ අවසාන හුස්ම පොද

උඩු හිතට හොරැහින්
යටි සිතෙන් පැන නගින
අපරිමිත ස්නේහයක්
නුඹ නමින් නැගෙන
මියයමින් තිබෙන

අයිතියක් ඇති නමුත්
අයිති කර නොගනිමින්
නුඹ නොවිඳිමින් විඳින
අපරිමිත ස්නේහයක්
නුඹ නමින් නැගෙන
මියයමින් තිබෙන

විඩින් විඩ නැගෙමින්
හිමි හිමින් ගැහෙමින්
විටින් විට වද දෙමින්
නුඹ නමින් මගෙ හිතේ
නුඹේ අනවසරයෙන්
මට හොරෙන් නැගුන

මිය යමින් පවතින
අපරිමිත ස්නේහයේ
අවසාන හුස්ම පොද

වැටෙන්නට කලියෙන්
රැකගන්න
නුඹ නමින් මගෙ හිතේ
මිය යමින් පවතින
ස්නේහයේ අවසාන හුස්ම පොද

රළ නොමැති සයුර මත
හිරු ගිලෙන ක්ෂිතිජයේ
ඉතිරි හිරු කිරණක්ය
නුඹ නමින් මගෙ හිතේ
මිය යමින් පවතින
ස්නේහයේ අවසාන හුස්ම පොද

සඳ නොමැති අහස් කුස
අඳුර මැද එළිය දෙන
තනි සිකුරු තරුවක්ය
නුඹ නමින් මගෙ හිතේ
මිය යමින් පවතින
ස්නේහයේ අවසාන හුස්ම පොද

ඉක්මනින් වැටේවි
වැටෙන්නට කලියෙන්
රැකගන්න
නුඹ නමින් මගෙ හිතේ
මිය යමින් පවතින
ස්නේහයේ අවසාන හුස්ම පොද

- ආදරේ කියන්නේ නොහික්මුණු කලාවක් -

-සුනෙත් වෙඩිවර්ධන-

ආවඩාපන් ඇහැළ හනිකට

ආවඩාපන් ඇහැළ හනිකට
ඇහළ ගසකට මල් පිපෙන්නට
බලා හුන් වසරක් මුළුල්ලෙම
ආ වඩාපන් ඇහැළ හනිකට

ඇහැළ හීනෙක නිදියගන්නට
ඇහැළ මල් දෝතින් නෙලන්නට
වළි කුකුල් ගීයට නටන්නට
ආවඩාපන් ඇහැළ හනිකට

ඇහැළ සුළගට හූ තියන්නට
ඇහැළ කිචි බිචි  හඬ අහන්නට
දුවන වැස්ස්සට හිස තෙමන්නට
ආඩාපන් ඇහැළ හනිකට

කොහා තාමත් හඩලනවා මෙහෙ තාම අවුරුදු කොහාට
ඇහැළ මල් වල සුවඳ පවසයි පොසොන් මාසේ නිමාව
තුන්මසක් අහවරයි බව කොහා තේරුම් ගන්නට
ඇහළ සඳ තව අහල වත් නෑ ආවඩාපන් හනිකට

-සුනෙත් වෙඩිවර්ධන-