එන්න සේරෝම එන්නමගේ සිහින තොටුපලට එන්න
සිහින ඔරුවක නැගලා සිහිනයෙන් සිහිනයට යන්න
දැන් විකුණනවා මගේ සිහින
එන්න අරගන්න
මං බලපු මං දැකපු මගෙ සිහින
බය හිතෙන
දුක හිතෙන
සතුට ඉතිරිලා යන
බලාපොරොත්තු පිරිච්ච
කැඩිච්ච ගෙවිච්ච පිච්චිච මගේ සිහින
පොඩිකාලේ මන් දැකපු
මන් වැඩියෙන්ම බයවෙච්ච හීනේ
බස් එකට නගිද්දි අම්මා මග හැරුනු සිහිනේ
අරගන්න කවරු හරි පොඩි එකෙක්ට දෙන්න
මං වගේ බයවෙන්න
සුපිරි ජයමල්ල දිනපු
රජ වෙච්ච සිහිනය
ගෙනියන්න ඒකත්
තඹයක් අතේ නැතිවෙච්ච දිනයක
කල්පනා කරන අතරතුර
නින්ද ගිය එක තත්පරේකදි නරඹන්න
මං වගේ සිහිනයෙන් රජවෙන්න
සිහිනෙන් මං පදින කාර් එක
මගෙ සිහින මාලිගේ
ඇයි මගේ ප්ලෙන් එක.
මගේ මුළු සිහින පාරාදීසයම ගෙනියන්න
සේරෝම අරගන්න
එකම එක සිහිනයක් පමනක්
ඉතිරිකර යන්න
මන් දකින්න ආසම හීනය
පෙට්ටියක අගුලු ලා ඇති
එපා අල්ලන්න කවුරුවත්
ඒක විතරක් තියා යන්න
මගෙ රෑ කුමාරි සිහිනය
ඉතින් සේරෝම එන්න
මගෙ සිහින තොටුපලට එන්න
සිහින ඔරුවක නැගලා සිහිනයෙන් සිහිනයට යන්න
කැමති සිහිනයක් තෝරලා අරගන්න
කිසිවෙකුට දෙන්න
නැත්තං නින්දේදි නරඹන්න
-සුනෙත් වෙඩිවර්ධන-
No comments:
Post a Comment